A súa ponte maior, "Ponte vella", asentada sobre restos dunha anterior romana, consérvase hoxe na súa estrutura medieval. O seu arco central foi un dos mais amplos de España ata que se comezaron a utilizar reforzos metálicos na enxeñaría. A catedral, de estilo a cabalo entre o románico final e o gótico inicial, posúe un pórtico, o do Paraíso (s. XIII), que é unha versión do Compostelán Pórtico da Gloria. A mestura entre estilos permite a convivencia de elementos románicos e renacentistas cunha excepcional capela barroca que alberga a célebre imaxe do San Cristo.

A riqueza de Ourense en mananciais de augas termais deu orixe ao núcleo da cidade. A fonte das Burgas é a mais coñecida e tradicional, situada en pleno centro histórico: as súas augas terapéuticas, afloran a unha temperatura de máis de 70 graos centígrados. As devanditas calidades deron pé á existencia, na cidade e nos seus arredores de diversos balnearios, hoxe en proceso de recuperación e desenvolvemento como sucede co resto da provincia.

Nos últimos anos a rehabilitación do centro histórico - restauración de fachadas, promoción de novas vivendas e edificios, a peatonalización da zona- así como a dotación de novas infraestruturas están conseguindo que a cidade volva novamente a vista ás súas raíces e ás súas ricas tradicións. O proxecto de conversión do conxunto do convento de San Francisco (s. XIV) no centro cultural da cidade, mediante a habilitación de espazos para un auditorio, un novo edificio para a Biblioteca Publica, etc., é símbolo da renovada cidade de Ourense para o máis inmediato futuro, o principio deste século XXI a punto de comezar.

Ourense é unha provincia con multiplicidade de paisaxes, dende montes ata chairas, que foron escenarios naturais de moitas producións cinematográficas.

Ourense é un nó ferroviario comunicado con toda a Península. Unha rede de autoestradas e estradas permite acceder en pouco tempo ás principais cidades do Eixo Atlántico, así como aos aeroportos do Peinador, en Vigo, ou de Lavacolla en Santiago de Compostela (ambos os dous a uns 100 km de Ourense). O seu campus universitario dota á cidade dun público novo e entusiasta cara ao Festival. Para o aloxamento dos visitantes, a cidade posúe unha ampla gama de hoteis e turismo de cuartos de diferentes categorías. A cidade de Ourense reúne condicións idóneas para o turismo e en especial para o termalismo.