Andrea Carcacía. Ourense, 21/10/11.  A Academia Galega do Audiovisual presentou este mediodía no Auditorio de Ourense a súa memoria anual, que comprende os traballos feitos entre xuño do 2010 e xuño do 2011. O seu presidente, Antonio Mourelos, foi o encargado de abrir o acto de presentación destes “Papeis da Academia 10-11”, no que tamén interviron a presidenta do Consorcio do Festival, Isabel Pérez, quen destacou a importancia do sector audiovisual como "valor cultural, pero tamén como valor económico", o director xerente do Consorcio Audiovisual de Galicia, Anxo Quintanilla, quen agradeceu o esforzo da presente edición do OUFF e comprometeuse a "apoiar a situación dramática que vive o Festival no plano económico", e tamén o músico Nani García.

A presentación centrouse  na figura deste anuario do audiovisual, que ademais do libro e o CD, inclúe “unha memoria USB onde engadimos un importante soporte gráfico de varias rodaxes, carteis ou entregas de premios, como os Premios Mestre Mateo celebrados este ano aquí en Ourense”. Neste anuario poderemos encontrar unha recompilación de todos os foros, festivais, premios e obras destacadas do audiovisual feitas durante esa etapa. Tamén conta cunha escolla de artigos de opinión de varias personalidades destacadas do sector. Para o peche do volume, deixáronse as páxinas en recordo aos membros da Academia que finaron durante ese período. Nesta edición, o CD de As músicas da Academia vai adicado enteiramente a Nani García porque, como destacou o director da Academia, “el merecíao especialmente: ademais do seu mérito como músico e compositor, que xa era suficiente, dedicou moito esforzo e horas a traballar na Academia”. O músico coruñés quixo agradecer esta homenaxe, especialmente “porque aquí, na Academia, atopei un lugar adecuado para min”. O disco inclúe unha escolma de pezas do artista dende o 2000 ata o 2009.

Porén, sobre a mesa do Auditorio tamén se falou da crise do sector audiovisual. Nani García quixo reivindicar que “ultimamente parece que todos os recortes van a parar á cultura e que non somos máis que un adorno de mesiña”. Na mesma liña, Isabel Pérez destacou como“hai que reivindicar a labor do audiovisual galego como xerador de riqueza e de emprego”. O director do Consorcio Audiovisual de Galicia, Anxo Quintanilla tamén falou sobre o tema coa confianza de que “este será o peor ano para nós. Xa pasamos dificultades antes e ista tamén a imos superar”.