Un OUFF Escola de récord entrega os seus premios
- A IX edición contou con 102 traballos á concurso.
- Os premios estiveron moi repartidos entre un público cheo de ilusión.
Ourense, 3 de decembro. O OUFF Escola celebrou a súa entrega de premios no Auditorio Municipal de Ourense, na que é a novena edición deste concurso. O actor Fernando González, foi o encargado de presentar o acto nunha sala chea de público novo e ilusionado.
A concelleira de Cultura, Belén Iglesias, destacou na gala que o importante deste concurso “son os rapaces porque eles son o futuro. Queremos que amedes o cinema e, para iso, hai que coñecelo”. Simone Saibene, membro do xurado, quixo “destacar a orixinalidade e calidade dos traballos presentados. Foi un traballo moi duro o de escoller”.
Pola súa banda, o alcalde de Ourense, Jesús Vázquez, que agradeceu á Deputación, á Fundación Carlos Velo e á Xunta de Galicia o esforzo para sacar adiante esta edición do OUFF, animou aos rapaces a “seguir facendo cine pero tamén a que vaiades a velo nas salas”.
Os galardóns desta edición foron:
Mencións especiais:
- Centro de Educación Especial Infanta Elena
- CEIP Os Ponzos de Ferrol
- IES As Barxas
- IES Poeta Díaz Castro
- IES Xesús Taboada Chivite
Mellor guión, na categoría de Infantil ou Primaria:
- “Na Corredoira”, CEIP Tenorio.
Mellor guión, niveis de ensino non universitario:
- “Entre o río e o mar”, IES Breamo
2º Premio, na categoría de Infantil ou Primaria:
- “O conto da muiñeira”, CEIP Nosa Señora dos Nomes.
2º Premio, niveis de ensino non universitario:
- “Chico, o cabalo”, IES As Barxas
1º Premio, na categoría de Infantil ou Primaria:
- “Mareas Vivas”, Colexio Sagrado Corazón de Placeres
1º Premio, niveis de ensino non universitario:
- “O Preguiceiro”, IES Alfoz Valadouro
O OUFF Escola, que este ano celebra a súa novena edición, bateu todo tipo de récords con 102 inscritos, 30 máis que o ano pasado. 18 dos traballos proceden da provincia de Ourense, 36 de A Coruña, 37 de Pontevedra e 11 da provincia de Lugo.
O OUFF Escola, organizado polo Concello de Ourense en colaboración coa Secretaría Xeral de Política Lingüística, ten como obxectivo achegar á infancia e xuventude ao mundo do cinema ademais de coñecer a súa visión sobre o mundo que os rodea. O impulso do uso do galego e o fomento da creatividade audiovisual son outras das súas funcións.