Ourense, 14|12|2011. A película gañadora de 9 premio Goya, Pa Negre, do cineasta mallorquín Agustí Vilaronga e baseada na novela homónima de Emili Teixidor, estrearase en OUrense na súa versión orixinal con subtítulos en galego o vindeiro día 20 ás 21.00 horas no Auditorio Municipal [entrada con invitación]. A iniciativa da Fundación Vicente Risco, en en colaboración coa Concellaría de Cultura da cidade, abarca a publicación  da edición galega do libro xunto co dvd subtitulado ao galego, traballo realizado polo tradutor do Festival de Cine (OUFF), Óscar Iglesias. A presentación da estrea  tivo  lugar  esta mañá na oficina do OUFF,  onde a presidenta do OUFF e edila de Cultura, Isabel Pérez, quixo destacar a “dimensión colectiva” deste proxecto, no que están implicados ao redor  de 70 empresas, institucións e particulares que  fixeron achegas económicas para o seu financiamento.

Pérez expresou o seu desexo de que a iniciativa “non quede nun feito puntual” e sexa, pola contra, “o inicio dunha estreita colaboración para o futuro”. Pola súa banda, Luís Risco,  secretario da Fundación Vicente Risco, agradeceulle á produtora que cedese os dereitos do filme de xeito desinteresado para a súa dobraxe, e ao propio Emili  Teixidor   “as   facilidades   amosadas   ao   longo   de   todo   o   proxecto”.   A publicación estará á venda o día 22 de decembro. A tiraxe inicial será de 1.500 exemplares cun prezo de 25€ no que se inclúen a novela, (traducida do catalán ao galego por Eduard del Castillo), e o dvd.  Os   beneficios   da   súa   venda   destinaránse   a   amortizar   os   20.000€   de   investimento. Con   este   proxecto,   a   Fundación   Vicente  Risco   pon   ao   día   o   que   foi   proxecto   central   dos intelectuais da Xeración Nós,  a internacionalización da lingua e  a cultura galegas. O obxectivo é pór en contacto a nosa cultura con outras sen necesidade de mediación do castelán, apoiando e fornecendo as traduccións directas ao galego en diversas publicacións.

A novela  Pa Negre,  de Emili  Teixidor, foi  publicada en 2003 pola editorial  Columna.  En 2004 gañou o Premi Lletra d'Or ao mellor libro publicado en lingua catalá. Na actualidade está xa na 16º reimpresión e, por primeira vez, é traducida ao idioma galego.  No ano 2010 foi levada ao cine por Agustí  Villaronga, acadando 14 nominacións aos Premios Goya dos que obtería 9,  así  como a Cuncha de Prata do Festival Internacional de Cine de San Sebastián. A historia, ambientada na Cataluña rural da posguerra, está protagonizada por Andreu, un rapaz da Plana do Vic que un día atopa dous cadáveres no bosque.  As autoridades quererán cargarlle as mortes ao seu pai, prendido por roxo, polo que Andreu tentará buscar os auténticos responsables. Unha historia a medio camiño entre a memoria e a ficción que retrata  a descoberta do mundo dos adultos e a iniciación ao sexo.