-
O OUFF colabora con UNICEF para facilitar agua potable a millóns de familias
-
O Ourense Film Festival donará a recaudación íntegra do ciclo Cine e Auga para adquirir bombas de auga e pastillas potabilizadoras
-
Segundo UNICEF, 785 millóns de persoas no mundo non teñen acceso a auga potable
A Deputación de Ourense e o Ourense Film Festival (OUFF) colaborarán con UNICEF para facilitar o acceso a auga potable naqueles lugares onde aínda non é posible. Así, o OUFF destinará a recadación íntegra do ciclo de películas Cine e Auga á adquisición de bombas de auga e pastillas potabilizadoras que UNICEF, a través da súa campaña Regalo Azul, repartirá en zonas desfavorecidas.
En concreto, o festival ourensano donará, en nombre dos espectadores do ciclo, 5 bombas de auga e 245.000 pastillas potabilizadoras. Cada bomba de auga ten a capacidade de abastecer a toda unha comunidade ou campamento de refuxiados, mentres que cunha soa pastilla pódense limpar entre 4 e 5 litros de auga.
O ciclo Cine e Auga, unha das novidades que trae a 24ª edición do OUFF, aspira a converterse nunha das seccións fixas do certame co obxectivo de potenciar unha das principais riquezas da provincia de Ourense: a auga. Esta primeira edición inclúe cinco importantes longametraxes que presentan unha trama central que xira en torno ao elemento. Son:
- “Ártico” de Joe Penna
- “Aguas tranquilas” de Naomi Kawase
- “Guadalquivir”, de Joaquín Gutiérrez Acha
- “La fuente de las mujeres”, de Radu Mihaileanu
- “La juventud”, de Paolo Sorrentino
As películas proxectaranse nos cinemas do centro comercial Ponte Vella ao prezo de 4 euros cada entrada. Tamén é posible velas co bono para 10 proxeccións que custará 30 euros. Os asistentes recibirán, antes da proxección, unha tarxeta con toda a información sobre a acción solidaria á que contribúen.
Segundo UNICEF, 785 millóns de persoas no mundo non teñen acceso a auga potable. O ano pasado, a organización facilitou este acceso a uns 62 millóns de nenos e as súas familias.