- O realizador galego Héctor Carré presenta no OUFF o documental Clown’s Planet, estrea en España
- Con este documental, que retrata o traballo dos pallasos activistas en situacións de conflito, o seu director reivindica o humor como antídoto a moitos dos problemas da sociedade
Ourense, 29 de setembro– O Ourense Films Festival (OUFF) acolle este mércores a estrea en España de Clown’s Planet, un documental do realizador galego Héctor Carré que fala de “como o punto de vista do humor pódenos axudar nunha sociedade na que todo son présas, esaxeracións, loitas, onde o que non é o número uno parece que non é nada”. A película retrata o traballo de pallasos activistas en diferentes lugares do mundo, un labor que Carré quere poñer en valor porque, asegura, “un pallaso fóra de lugar sempre fai sorrir á xente”.
O documental segue, entre outros, os pasos de Iván Prado, un pallaso activista galego cofundador da asociación Pallas@s en rebeldía; o clown de fama internacional Leo Bassi, fundador dun espacio de reunión e reflexión no barrio de Lavapiés de Madrid, chamado “O Paticano”; e Patch Adams, mundialmente coñecido como o “médico da risoterapia”.
Rodada en lugares tan diversos como Jerusalem, San Petersburgo, A Coruña, Nablus o Madrid, afonda no traballo dos activistas en lugares de conflito, como os campamentos de refuxiados en Palestina, ou de sufrimento, como os hospitais e orfanatos para persoas con discapacidade severa en Rusia.
Estrea en España
O filme estréase no Festival de Cinema de Ourense dous días antes de facelo en cinemas. É a primeira vez, por tanto, que poderá verse en España. A proxección terá lugar no Teatro Principal ás 22:00 horas dentro do ciclo Panorama Galicia.
Héctor Carré
Héctor Carré (A Coruña, 1960) ten unha ampla experiencia no mundo audiovisual e no literario. No ano 1993 funda Sun Lúa, a productora audiovisual coa que produce moitos dos seus traballos: Dame algo, Dame lume, A promesa ou Personal movie. Ten impartido cursos de dirección no Master de Cinematografía e Teatro da Universidade da Coruña e de guión e montaxe cinematográfico na Universidade de Santiago de Compostela.