- O festival repartirá polo menos 8 premios na súa Sección Oficial, tres deles de nova creación
- Abriranse varias canles online para a recepción de películas que queiran participar
- O Centro Cultural Marcos Valcárcel volverá a ser a sede do certame
A 24ª edición del Festival Internacional de Cine de Ourense (OUFF) xa ten datas: celebrarase do 27 de setembro ao 5 de outubro de 2019 e terá de novo como sede o Centro Cultural Marcos Valcárcel.
A Xunta de Goberno da Deputación de Ourense vén de aprobar as bases reguladoras do certame, elaboradas en colaboración coa Fundación Carlos Velo. Nelas tamén se establecen os premios do festival e as súas cuantías, que superan o 300% do presuposto destinado aos galardóns na edición anterior.
Así, o xurado da Sección Oficial de longametraxes decidirá as seguintes distincións:
- Premio Calpurnia á mellor película, cunha dotación económica de 18.000 euros;
- Premio Carlos Velo á mellor dirección, dotado con 4.000 euros;
- Premio Especial do xurado, con 2.000 euros;
- Premio ao mellor guión, novidade da 24ª edición e que contará cunha dotación económica de 2.000 euros;
- Premio á mellor interpretación, tamén de nova creación e dotado con 2.000 euros.
Pola súa banda, a organización do festival entregará dous premios especiais:
- Premio Galicia, dotado con 5.000 euros, para a mellor obra con produción ou coprodución galega exhibida durante o festival;
- Premio Especial Eduardo Barreiros á mellor ópera prima española, estreada entre setembro do 2018 e setembro do 2019 e que contará cunha dotación económica de 2.000 euros. Este galardón tamén é de nova creación.
Por último, os espectadores que acudan ás proxeccións da Sección Oficial determinarán cos seus votos o Premio do Público, que recibirá 3.000 euros.
Recepción de películas a concurso
Na Sección Oficial de longametraxes da 24ª edición do OUFF poderán participar todas aquelas películas de ficción, animación e documentais que teñan unha duración superior a 60 minutos e que non se exhibiran nin editaran en España en salas públicas (salvo festivais), televisión, DVD, vídeo ou Internet con acceso libre antes do 27 de setembro de 2019.
A organización abrirá proximamente varias canles online para a recepción de traballos. Polo momento, as obras xa poden ser enviadas en formato físico (DVD ou Blu-Ray) á sede do festival no Centro Cultural Marcos Valcárcel (rúa Progreso, 30, 32003, Ourense). O prazo de recepción finaliza o día 15 de agosto de 2019. Unha comisión designada pola organización do festival será a encargada de seleccionar os traballos finais que participarán na competición.
Comeza así a conta atrás para a edición dun festival, o OUFF, que aspira a converterse nun dos certames referentes no panorama español.
Podes consultar as bases completas da Sección Oficial AQUÍ.